Indwara z`umumwijima (hépatite A, B & C) zitandukaniye he?

posted on Jun , 13 2010 at 19H 43min 14 sec viewed 11081 times

Hepatite A,B na C, zose ziterwa n`agakoko ko mu bwoko bwa virus igenda ikangiza umwijima. Gusa igitandukanye ni uburyo izo ndwara ziteye n`uko zigendekera abazirwaye wongeyeho n`uburyo zandura.



Hepatite A



Niyo hepatite yonyine idateye ubwoba kandi ikira nk`ako kanya idateye ingaruka. Rimwe na rimwe iyo ukiyandura usa nk`urembye, ariko ubundi ntunabona ibimenyetso.



Iyi hepatite A yandura ku buryo bworoshye, yandurira mu biribwa kubera isuku idahambaye. Urugero nk`iyo uyirwaye ateguye ibiribwa atakarabye neza intoki igihe yavuye mu bwiherero, cyangwa se amazi yanduye. Iyi hepatite igaragara mu bihugu bikiri mu nzira y`amajyambere.



Iyi hepatite yandurira no mumibonano mpuzabitsina ariko ni gake cyane.



Abahanga bashoboye kubona urukingo ariko ntirurashobura kutugeraho kuburyo bworoshye hano mu Rwanda.



Hepatite B



Iyi hepatite B kimwe na C, zose ziteye ubwoba kandi zirica.



Hepatite B yandurira mu maraso, urugero imibonano mpuzabitsina, inshinge, amaraso yo kwa muganga, igihe umubyeyi abyara ashobora kuyanduza umwana. Inshuro 90% umubiri ubasha kwirukana iyo virus ntazindi ngaruka. Ariko 10%, virus iguma mu mubiri maze indwara igakomeza, ikavamo kurwara umwijima uhoraho (hepatite chronique), cyangwa kanseri y`umwijima. Igitangaje ni uko iyi virus ishobora guterwa na babandi baba batarayirwaye ariko barigeze kuyandura maze umubiri ukayirukana.



Urukingo rurinda iyo ndwara rwaravumbuwe.



Abantu bafite ubuzima budakomeye nibo usanga bafite ibyago byo kurwara umwijima uhoraho kurusha abandi : abageze muza bukuru, abaterwa amaraso kwa muganga, abarwaye SIDA.



Hepatite C



Hepatite C, yandurira cyane mu maraso, kera yanduriraga mumaraso yo kwa muganga kuri 80%, ariko ubu kubera iterambere amaraso arapimwa bihagije kuburyo itakihandurira. Kuri ubu usanga yandurira munshinge kubitera ibiyobya bwenge iyo bazitizanya, no kubashyiraho za tatuwaje (tatouage), n`abashyiraho amaherena (piercing) mu buryo budafite isuku ihagije. Kwandurira mu mibonano mpuzabitsina birashoboka ndetse no mu kuvuka ariko ibyo byose ni gake.



Nta kuringo ruraboneka rurinda hepatite C.



30% by`abayanduye , umubiri ushobora kwirukana iyo virusi nta nkurikizi, ariko 70% iyo banduye barwara iyo ndwara. nka hepatite B, ikibazo ni uko hari benshi bagendana virusi ariko ari bataraga (porteurs sains), abo rero barayanduza kandi batanabizi.



Ntawumenya uburyo iyo indwara izitwara, iyo ukiyandura usanga akenshi ibimenyetso bitagaragara. hari abarwara umwijima uhoraho, ukanabyimba. ushobora no kuvamo kanseri y`umwijima.



TUZIRINDE DUTE? TUZIRINDE ABANDI DUTE?



1. Isuku: gukaraba intoki n`isabune buri gihe cyose uvuye mu bwiherero, koza ibiribwa n`amazi meza, gukoresha amzi asukuye.



2. gukoresha ibikoresho by`isuku bwite, nk`inzembe n`ibindi



3. Kwirinda imibonano mpuzabitsina idakingiye.



AICHA UWAMAHORO