Abatuye umurenge wa Kansi bamaze gusobanukirwa n’akamaro ko kuboneza urubyaro

posted on Sep , 02 2010 at 17H 58min 20 sec viewed 2629 times

Abaturage bo mu murenge wa Kansi mu karere ka Gisagara, baratangaza ko bamaze gusobanukirwa n’akamaro ko kuboneza urubyaro. Ibi babitangaje nyuma y’ikiganiro bagiranye n’abakozi b’Umushinga ugamije guhindura imyitwarire mu by’ubuzima ku bufatanye na Pro Femmes Twese Hamwe. Iki kiganiro cyabaye mu rwego rwo gukangurira abaturage bari barinangiye kuboneza urubyaro, bakaba basoje iki kiganiro, bamaze gufata umwanzuro wo kuboneza urubyaro.

Mu cyumba cy’inama cy’ibiro by’umurenge wa Kansi, hateraniyemo abaturage bavuye mu bice bitandukanye by’umurenge wa Kansi, aba baturage bagiranye ibiganiro n’abakozi b’umushinga ugamije guhindura imyitwarire mu by’ubuzima (Behavior Change and Social Marketing mu rurimi rw’icyongereza).

Ibi biganiro byari bigamije kwereka abaturage akamaro ko kuboneza urubyaro, nyuma yo kuganira no kungurana ibitekerezo; aho abaturage babazaga ibibazo, bitandukanye ku kuboneza urubyaro, nyuma yo kuganira abaturage bamwe mu bitabiriye ibiganiro, nyuma yo kumva akamaro ko kuboneza urubyaro, bahise bafata icyemezo cyo kuboneza urubyaro. Aba bahisemo kuringaniza urubyaro nabo ngo bazahindura abandi basize mu midugudu. Bagize bati “ubu tumaze kumenya ingaruka zo kubyara abana benshi, none twe duhisemo gufata ingamba zo kuringaniza urubyaro."

Umukozi w’umurenge wa Kansi ushizwe imibereho myiza y’abaturage, Edmond Kimenyi, avuga ko ubu buryo bwo kwigisha kuringaniza urubyaro bikozwe n’abaturage ubwabo, bitanga umusaruro kuko umuturage yumva ibyo mugenzi we amubwiye kurusha igihe haza umuyobozi cyangwa muganga.

Guillaume Bakari Mukenge, umujyanama mu bya Tekiniki w’umushinga Behavior Change Social Marketing, ikorana na Minisiteri y’Ubuzima, ndetse na Pro Femmes Twese Hamwe, muri aka karere ka Gisagara, avuga ko ubu buryo bwo kuganira n’abaturage, biba byiza kuko baganira bisanzuye, kandi bakabaza ibibazo byose bafite. Ati “Ubu twatangije uburyo bwo guhindura imyifatire, biciye mu buryo bita kuganira rusange, twifuza ko abantu bakwakira uburyo butandukanye bwo kuringaniza urubyaro, ariko ubu buryo bukomwa mu nkokora n’ibibazo byinshi, harimo n’ibihuha bitandukanye; ibi rero ntabwo wabihindura usanze abantu mu bigo nderabuzima, kuko iyo abantu bari iwabo baba bahura n’ibihuha byinshi, ibi ubihindura iyo usanze abantu ahantu ku buryo muganira, ukabasubiza kubyo bakubaza byose.”

Mu ngamba y’imyaka 5 (kuva mu 2008-2012) Leta y’u Rwanda, yihaye gahunda yo kuzamura ubukungu, no kugabanya ubukene, hatekerejwe mbere na mbere ku kwibanda ku rwego rw’ubuzima. Ni muri urwo rwego kuringaniza urubyaro ari imwe mu ngamba y’ingenzi yihutiwe gukorwa.



MIGISHA Magnifique