Minisitiri Louise Mushikiwabo ari mu bahabwa amahirwe menshi yo kuyobora ONU Femmes

posted on Sep , 02 2010 at 16H 59min 01 sec viewed 24142 times

Tariki ya 15 Nzeli hazatangira inama ya 65 y’Inteko rusange y’Umuryango w’Abibumbye (ONU). Uwo munsi nibwo hazaba amatora y’uzayobora ishami rishya ry’Umuryango w’Abibumbye ryita ku bagore (ONU Femmes). Ku bakandida 10 bahatanira uwo mwanya , 7 ni abakomoka ku mugabane w’Afurika.

Amakuru dukesha ikinyamakuru Jeune Afrique no 2590 cyo kuwa 29/08-4/09/2010 aravuga ko kubera ko Afurika ifitemo abakandida benshi biyiha amahirwe menshi yo kwegukana uyu mwanya ukomeye. Umunyamabanga Mukuru wa ONU Ban Ki-moon we yarangiye gutangaza ko yiteguye gushyiraho umuntu ukomoka muri Afurika.

Mu bagore 7 bo kuri uyu mugabane, babiri ngo nibo bahabwa amahirwe menshi: Nebiha Gueddana, umuyobozi w’Ikigo gishinzwe umuryango n’ibibazo by’abaturage muri Tuniziya na Louise Mushikiwabo, Minisitiriw’Ububanyi n’Amahanga w’ u Rwanda.

Abandi bagore bo ku mugabane w’Afurika bahatanira uyu mwanya ni:

- Alcinda Abreu : Mozambique

- Aїssata Bagnan Fall : Nigeria

- Winnie Byanyima : Uganda

- Rachel Mayanja : Uganda (uyu yatanzwe na Gambie kuko ariho akora)

- Joséphine Ouédraogo : Burkina Faso

UNIFEM yagiyeho tariki ya 2 Nyakanga 1980 ikaba izahuza amashami yita ku bibazo by’abagore mu Muryango w’Abibumbye ariyo: Ishami rishinzwe guteza imbere umugore (Division for Advancement for Women:DAW) , Kaminuza ishinzwe ubushakashatsi no kwigisha iby’iterambere ry’umugore ( International Research and Training Institute for the Advancement of Women: Instraw), Ibiro bishinzwe ubujyanama mu by’uburinganire bw’ibitsina (Office of the Special Advisor on Gender Issues OSAGI) n' Ikigega cy’Umuryango w’Abibumbye gishinzwe itarambere ry’umugore ( United Nations for Development Fund for Women/UNIFEM).

MUHIRE Hilaire