Umukobwa w’ Umufaransakazi ufite inkomoko mu Rwanda, Shelina Scaravelli w’ imyaka 15 y’amavuko, ni we wegukanye umwanya wa mbere nka Nyampinga uhiga abandi mu bakobwa benshi bari biyamamarije guhatanira umwanya wa Nyampinga uhagarariye ibuhugu byo muri Afurika y’Iburasirazuba i Paris mu Bufaransa (Miss East Africa 2011 Paris).
Hari mu ijoro ryo kuri uyu wa Gatandatu tariki 4 Kamena, ubwo abakobwa 12 baturuka mu bihugu bigize Akarere k’ Afurika y’ Uburasirazuba: Kenya, Uganda, Tanzaniyaa, Burundi, n’ u Rwanda ; aho u Rwanda rwegukanye umwanya nyirizina.
Miss Shelina ufite indabyo hagati ari kumwe n'inshuti n'umuryango nyuma yo kwambikwa ikamba
Aba bakobwa bari bateraniye i Paris mu nkengero z’umunara wa ‘Tour Eiffel’ ahazwi nk’ahantu nyaburanga hatatse Umujyi wa Paris, mu birori byateguwe na Ambasade ya Kenya mu Bufaransa, bigaterwa inkunga na Kenya Airlines, Black Up ndetse na Bank of Africa.
Mu gice cya mbere cy’ aya marushanwa, abakobwa bariyerekanye muri za défilés hagamijwe kwerekana urusha abandi ubwiza no kuberwa. Ibi byose bikaba byaraherekezwaga n’ibikorwa bitandukanye birimo imbyino Nyarwanda z’ itsinda Mpore, n’ibindi.
Nyuma ya Shelina, haje Umurundikazi Arielle Mugisha, naho ku mwanya wa gatatu haza Umunyakenyakazi June Odhiambo.
Kuva iburyo hari: Miss Shelina, Arielle Mugisha na Jane Odhiambo
Dore urutonde rw’abakobwa bari bitabiriye amarushanwa ya Miss East Africa 2011 Paris:
• Burundi: Naomi Mbonabuca, Arielle Mugisha, na Floriane Nduwimana
• Kenya: Serah Elastia, Jemimah Kamau, na June Odthiambo
• Rwanda: Leila Rahamathli, Maeva Haguna, na Shelina Scaravelli
• Tanzania: Winnie Linda
• Uganda: Sheila Bulenzi, na Isabel Mugabo Kanyena
UMUHOZA N. Jessica
.gif)
